TALETŠO YA DITŠHIŠINYO TŠA BONKGETHENG BAO BA TLA ŠOMAGO GO KOMITI YA SEMOLAO YA BOLOTADINGWALWA, GO TLOGA KA 2006 GO FIHLA KA 2008
Maloko ka moka a ditirelo tša bokgobapuku le tshedimošo, intasteri ya phatlalatšo (kgatišo le tsebeihlo) le mekgatlo e mengwe yeo e nago le kgahlego ba mengwa go šišinya nkgetheng wa maleba yoo a tla thwalago ke Komiti ya Bolotadingwalwa go ya ka karolo 8 (1-2) ya Molao wa Bolotadingwalwa wa 1997 (Molao wa 54 wa 1997). Tona ya Bokgabo le Setšo o tla kgetha Komiti ya sebaka sa mengwaga e meraro, go tloga ka Janaware 2006 go fihla ka Disemere 2008.
Tebano ya Komiti ye ke go kopanya le go tšwetšapele phethagatšo ya Molao wa Bolotadingwalwa wa 1997. Mešomomegolo ya Komiti ke go eletša Tona ka ga morero o mongwe le o mongwe woo go šongwago ka wona ka gare ga Molao wo, go dira dikeletšo go Tona malebana le melawana efe goba efe yeo Tona a ka e dirago ka fase ga Molao wo, go kopanya mešomo yeo e dirwago ke mafelo a bolotadingwalwa, go eletša mafelo a bolotadingwalwa mabapi le ditaba tše dingwe le tše dingwe tšeo go šomilwego ka tšona ka Molaong wo, le go hlama dikarolo tša dikomiti goba dihlophatšhomo ge go hlokagala go nyakišiša ka ga mešomo yeo e amanago le phethagatšo ya Molao wo.
Bonkgetheng ba swanetše go emela bakgathatema bao ba nago le botsebi makaleng a ditirelo tša bokgobapuku le tshedimošo; lekala la phatlalatšo; bolaodi; matlotlo le papatšo; le/ goba tsebo ya le/ goba kgahlego ya diphatlalatšo tša bolotadingwalwa.
Mang le mang yoo a ratago go šišinya motho yoo a kago direla Komiti ya Bolotadingwalwa o swanetše go tlatša le go romela fomo ya tšhišinyo ya mmušo go Kgoro ya Bokgabo le Setšo. Fomo ya tšhišinyo e swanetše go akaretša Ditlaleletšo tše di latelago:
A: Lengwalo leo le nago le maina ka botlalo le di dintlha tša mošišinywa tša go ikopanya le yena, le hlalošago ka a loketšego go thwalwa go ya ka dinyakwa tše go boletšwego ka tšona ka godimo le maina a batho ba bararo ba go tseba mošišinywa bao go tla bago bonolo go ikopanya le bona
B: Lengwalo la mošišinywa la go dumelwa tšhišinyo
C: Kanegelophelo-kopana ya mošišinywa, yeo e laetšago tshedimošo ya mošišinywa ka fase ga dihlogo ka moka tše di latelago.
a Thaetlele le maina ka botlalo b Nomoro ya boitsebišo c Boagi d Dintlha ka botlalo tšeo re ka ikopanyago le wena ka tšona e Maemo a bjale a mošomo le leina la mongmošomo f Mangwalo a thuto g Maitemogelo a maleba h Mafapha a botsebi i Boleloko bja mokgatlo, boto, bj.bj. fetilego le bjale j Bong k Morafe
Hle, lemoga gore ye ga se kwalakwatšo ya poso. Putsetšo ya maloko a Komiti ya Bolotadingwalwa e tla kgaoletšwa go ditefelo tše di kwagalago tša ditshenyegelo tša diputseletšo le leeto ge go tsenelwa dikopano gabedi ka ngwaga (Tshwane goba mafelong a mangwe)
Letšatši la go tswalela la ditšhišinyo ke 31 Mei 2005.
Fomo ya semmušo ya go dira ditšhišinyo, gammogo le khopi ya Molao wa Bolotadingwalwa, wa 1997 di hwetšagala go tšwa go:
Kgoro ya Bokgabo le Setšo
mogala : 323 5300 X235
fekese : 323 5287
